Í morgun skiluðum við húsinu og lögðum af stað til Köben. Ferðin gekk vel þrátt fyrir smá  bílveiki hjá Andreu, en til allra lukku þá vorum við nýkomin inn á McDonalds þegar hún kastaði upp. Þannig það var hægt að skola úr fötunum í vaskinum þar. Það sem eftir lifði af ferðinni gekk þó glimrandi vel og ekki varð skvísan meira veik.

Núna erum við upp á hótel herbergi og er Andrea að reyna að sofna, henni reynist það frekar erfitt þar sem hún er ekki von því að við erum inni hjá henni þegar hún er að sofna. Á morgun er síðan stefnan tekin á tívolíið og eru allir mjög spenntir fyrir því

Flugið gekk alveg prýðilega vel. Lentum í smá veseni með bílaleigubílinn, fengum ekki bílinn sem við höfðum pantað og var ljóst að það kæmust ekki þrír fullorðnir og tvö börn í hann ásamt töskum. Eftir smá spjall við Hertz þá fengum við örlítið stærri bíl. Ferðin frá Billund flugvelli og í sumarhúsið var þvílíkt ævintýr. Notuðumst við Neverlost GPS tæki sem við erum búin að endurskýra sem Alwayslost, en tækið tók okkur í gegnum ÖLL litlu þorpin sem eru á leiðinni frá Billund til Nr. Nepel.  Við vorum orðin ansi pirruð og vorum því mjög ánægð þegar við loksins komumst í hús.

Á sunnudeginum fórum við í mjög svo flotta og dýra sundlaug, þar voru slatti af rennibrautum og mikið um að vera. Andrea var mjög huguð og fannst geðveikt gaman að fara með pabba sínum í stærstu vatnsrennibrautina. Stúlkan er upprennandi adrenalínafíkill

Á mánudeginum kíktum við til Esbjerg og röltuðum þar um göngugötuna. Versluðum auðvitað örlítið í HM.

Þriðjudagurinn var svo stóri dagurinn sem stelpurnar voru búnar að bíða hvað spenntastar eftir. En þá fórum við í Legoland. Það var ekkert smá flott, allt saman og ótrúlegt hvað er hægt að búa til úr legokubbum. Við fórum síðan í tækin og Andrea fór í sinn fyrsta rússibana. Henni fannst það geðveikt!! Hún var aftur á móti frekar ósátt með að mega ekki fara með pabba sínum í Xtreme rússibanann og í vatnsrússíbanann, en hún var ekki nógu stór. Hún fékk þó að fara í slatta af tækjum og var mjög kát með þau öll nema litlu bílana sem keyrðu um á hraða snigilsins.

Á miðvikudaginn (í gær) þá fórum við á ströndina. Það rættist vel úr veðrinu og var ekki búist við því þegar lagt var af stað að hægt væri að fara í sjóinn og því voru engin sundföt tekin með. Andrea var því bara á nærunum og bolnum í sjónum.

Í dag (fimmtudagur) þá fórum við í Lövenpark, Givskud Zoo, og var það ofboðslega gaman. þetta er frekar stór dýragarður og skiptist maður á að ganga um og skoða dýrin og keyra um. Það var skemmtilegt að sjá dýr eins og gírafa, antilópur, ljón, buffalóa, górillu og fleiri í svona miklu návígi. Gírafarnir voru bara alveg upp við bílana maður hefði getað snert þá. Við misstum af þegar ljónunum var gefið að borða en sáum þó eina ljónynjuna gæða sér á antilópu. Í garðinum var einnig risastór leiksvæði fyrir krakkana, með þrautabrautum og trampólínum. Það er alveg óhætt að segja að allir hafi skemmt sér mjög vel í dag og er alveg nauðsynlegt að fara í þennan dýragarð þegar fólk er á ferðinni hérna á Jótlandi.

Á morgun er ekki alveg ráðið hvað við gerum, veltur á veðrinu. En það er búið að rætast mjög mikið úr því. Fyrstu tvö dagana var soldill vindur og stuttir rigningarskúrar en síðan hefur verið alveg í kringum 23 stiga hiti.

Sjáumst aftur 4 Júlí hress og kát

En það er aldrei að vita nema við hendum inn nokkrum myndum frá dK

En já s.s. eitt stærsta afmælið er væntanlega 100 ára afmæli Hafnarfjarðar. Við tókum auðvitað þátt i gleðinni og fórum með Andreu og Heklu á laugardeginum á Thorsplanið, stelpurnar voru málaðar í framan og á meðan við biðum í röðinni eftir því þá fylgdist maður með götuleikhúsinu. Voru flestir af erlendu bergi brotnir sem voru að taka þátt í því, en að engu síður skemmtilegt. Við röltuðum síðan í Hellisgerði og fengu stelpurnar gefins óskasteina, hittu álfadrottinguna og “kónginn”, en það var víst kvenkynskóngur. Það var mjög mikið um að vera í Hellisgerði og gaman að rölta þar um. Við fórum síðan auðvitað á Víðistaðatún að hlusta á tónleikana aðallega samt til að hlusta á sveitina hennar Ástrósar, Vicky Pollard. Á sunnudeginum kíkti pabbi til okkar og fór hann með okkur niður á bryggju, þar var nú eitthvað sem heillaði. Auðvitað hoppukastalinn fyrir yngri kynslóðina, björgunarþyrlan sýndi björgunaraðferðir og svo var boðið upp á siglingar en það var svo löng röð í það að við nenntum ekki að bíða. Við fórum þvi að skoða víkingagötuna og ætluðum síðan að gæða okkur á 100 metra afmæliskökunni.. en við vorum víst við vitlausan enda. Skurðarmennirnir dreifðu sér ekki og voru allir á einum endanum. Við gáfumst upp og kíktum bara í bakaríið og fengum okkur kleinu og snúð.

Þessa helgi átti amma líka afmæli og var haldið upp á það í eyjum. Minnir að hún sé orðin 86 ára.. alveg til skammar að muna ekki hvað amma sín er gömul.

Síðan núna 2 júní þá átti Svandís afmæli.. það var náttla stærsta afmælið, skvísan orðin 1 árs og lét sko vin sinn (9 mánaða) finna fyrir því að hún væri eldri. Var ansi hrifin af hárinu hans, greyið var orðinn soldið hræddur við hana. Ósk mamma hennar átti líka afmæli 6 júní ásamt Ástrósu. Síðan núna 17 júní þá á Þóra Gísla afmæli og Anna amma og Valdi afi eiga brúðkaupsafmæli.. þannig það er nóg að gera í að óska fólki til hamingju

Til hamingju öll sömul með afmælin

Eyjar:
Við mæðgurnar skruppum til eyja yfir eina helgi. FYrsta sinn sem Andrea fór í flugvél og gekk rosalega vel. Henni fannst það mjög gaman. Við vorum mjög heppnar með veður og vorum mikið úti við. Hún fór meðal annars í sund með ömmu sinni og frænku. Fyllti hús afa síns af fíflum, en hún var þvílíkt ánægð með öll blómin sem hún gat týnt. Auðvitað horfðum við svo á júróvisjón og kusum. Andrea var mjög hrifin af laginu frá Albaníu, sjóræningjalaginu, danska laginu og auðvitað því íslenska. Hún var ekki alveg að fatta að hún gæti ekki kosið það íslenska.

Átak:
Við ætluðum að taka 3 daga í svona hreinsun og bjuggumst við að það yrði mjög erfitt, en það reyndist mun erfiðara en við töldum. Fyrsti dagurinn var ekkert svo slæmur en þá lifðum við á prótein shake og fengum grillaðan lax í kvöldmatinn. Næstu tveir dagar áttum við að lifa bara á ávöxtum og fá lax í kvöldmatinn. Dagur tvö var nú bara martörð, hausverkurinn alveg hræðilega hræðilegur og engin verkjalyf sem virkuðu á hann, og svengdin. Próteinið seðjaði alla vega hungrið en það gerðu ekki ávextirnir. Við þraukuðum hálfan þriðja daginn en þá ákváðum við að hætta í þessu og fengum okkur að borða VIð vorum nú samt dugleg að mínu mati enda var þetta erfitt verkefni. En nú er bara að halda áfram og borða hollara fæði.

Segi ykkur frá afmælunum seinna.. Gísli setur örugglega inn myndir.

Í dag er s.s. fyrsti dagurinn okkar á þessum kúr og eigum við bara að drekka prótein í dag og borða síðan grillaðan lax í kvöld. Enn gengur ágætlega, en þetta verður örugglega mjög erfiðir þrír dagar. Næstu tvö daga eigum við bara að borða ávexti. Leyfum ykkur að fylgjast með.

En já við Andrea fórum við til eyja síðustu helgi.. það er eiginlega bara efni í annan póst.. kem kannski með það inn á næstu dögum.

http://www.youtube.com/watch?v=muP9eH2p2PI

Og ekki gleyma að kíkja á tónleika á víðistaðatúni Laugardaginn 31 kl 17:00

Vicky Pollard spilar .. smá plug fyrir Astrós frænku

Andrea Ruth, originally uploaded by Guðrún og Gísli.

Andrea fékk gleraugun sín í dag. Hún var ofboðslega ánægð með og gekk vel að vera með þau. Það fyrsta sem hún sagði eftir að þau voru komin upp var ” Mamma, nú sé ég þig miklu betur.”

Annars erum við mæðgurnar að fara til eyja á morgun og verðum þar fram á sunnudag.

Edit frá pabba… þetta er með flottari myndum sem ég hef séð ! yndislegt .. kossar frá miami